قلم ازرق

قلم أزرق
صديق مخلص
بَقاله زمان
وعمره ما غش
ولا إنه في يوم كتب ألوان
مِعَلِّم جوه ألف كتاب
ومالي ألف كرّاسة
وبعمل ميت حساب وحساب
لو إتكلم
وليه ميت شرط
وتلـكيــكة
ما يستخدمش أستيكة
*******
كلام صارم
مفيش رجعة
خصوصا لو كلام رسمي
وعمره في يوم مايتلخبط
كده في إسمي
ما بيجيــش يوم ويتسرّع
ويتهَـوَّر
عشان عارف
هناك واقف
قلم أحمر
بيتحكِّم ويتأَمـَّر
وطول العمر مترشّح
يكون قاضي
على الأقلام
ومهما يكون هناك قاضي
ولا يهمّه
وطول ما الحبر ده في دمّه
يعيش يكتب
*******
هيفضل سيد الأقلام
عشان صاحي وعمره مانام
وطول ما السن بـِينَقَّــط
حروف زرقا
لا هَيهَرتل ولا يشَخبَط
هيفضل فارس الكلمة
ومهما العمر بيعَدِّي
ومهما أقلام بتتفـرّق
تعيش وتموت كدا ياصاحبي
قلم أزرق